Hann sagðist ósáttur við þessa þróun og bætti við að það væri hið smitandi Deltaafbrigði sem veldur fjölgun smita í Bandaríkjunum. Hann sagðist telja að hægt hefði verið að komast hjá því að lenda í þessari stöðu ef fleiri Bandaríkjamenn væru búnir að láta bólusetja sig.
Hann sagðist einnig telja að heilbrigðisyfirvöld eigi að íhuga að breyta kröfum um notkun andlitsgríma hjá bólusettu fólki til að halda aftur af útbreiðslu veirunnar. Hann sagði einnig að hægt sé að bjóða viðkvæmum hópum upp á þriðja skammtinn af bóluefni. BBC skýrir frá þessu.
Hann benti á að á nokkrum stöðum, þar sem smitum fer fjölgandi, sé fólk nú þegar hvatt til að nota andlitsgrímur innanhúss án tillits til hvort það sé bólusett eða ekki. Þetta á til dæmis við í Los Angeles.
Bandaríkin voru lengi meðal forysturíkja í bólusetningum en í apríl fór að draga úr þátttöku almennings en nú hafa 163 milljónir lokið bólusetningu eða um 49% þjóðarinnar. Ef aðeins er litið til þeirra sem eru eldri en 12 ára er hlutfallið 57%.
„Þetta er aðallega vandamál meðal óbólusettra og það er ástæðan fyrir að við erum að biðja fólk um að láta bólusetja sig,“ sagði Fauci.
Þátttaka í bólusetningum er sérstaklega lítið í suðurríkjunum en þar hefur tæplega helmingur íbúanna fengið að minnsta kosti einn skammt. Það er einmitt í þessum ríkjum þar sem smitin eru flest þessa dagana. 40% af öllum nýjum smitum í landinu eru í Flórída, Texas og Missouri.
