Danska ríkisútvarpið, DR, skýrir frá þessu. Fram kemur að bóluefni frá þessum tveimur framleiðendum berist enn þrátt fyrir að þau séu ekki notuð. Ísskápar sóttvarnastofnunarinnar eru því fullir af bóluefnum sem eru ekki notuð nema að mjög takmörkuðu leyti. Hægt er að fá bólusetningu með þessum tveimur bóluefnum ef fólk biður sérstaklega um það. Þá leið hafa um 45.000 manns valið.
„Það er algjörlega óskiljanlegt að þessar sendingar hafi ekki verið stöðvaðar,“ hefur DR eftir Peder Hvelplund, talsmanni Einingarlistans í heilbrigðismálum, um málið. Hann sagðist ætla að ræða þetta strax við heilbrigðisráðherrann svo hægt sé að stöðva þessar sendingar.
Flemming Konradsen, prófessor í alþjóðaheilbrigðisfræðum við Kaupmannahafnarháskóla, sagði að það skapi ákveðinn vanda að bóluefnin komi til Danmerkur áður en þau séu send til annarra landa sem hafa þörf fyrir þau. Þegar þau koma fyrst til Danmerkur er ekki hægt að nota þau í hinu alþjóðlega Covax bóluefnasamstarfi en aðeins er tekið við bóluefnum beint frá framleiðendum í því verkefni en það miðar að því að útvega fátæku ríkjum heimsins bóluefni. Hann sagði að af þessum ástæðum eigi Danir nú þegar að beina bóluefnasendingunum annað. Það sé hagur þeirra eins og annarra að tök náist á faraldrinum.
Julia Raavad, hjá Læknum án landamæra, sagði þetta vera sorglegt. Í mörgum löndum sé heilbrigðiskerfið að kikna undan annarri og þriðju bylgju faraldursins, því eigi að beina væntanlegum sendingum eitthvað annað en til Kaupmannahafnar.
Magnus Heunicke, heilbrigðisráðherra, gaf DR ekki kost á viðtali en sagði í tölvupósti að ríkisstjórnin meti stöðugt þörfina fyrir hvað þurfi að eiga af bóluefnum á lager og hvert bóluefni verða gefin í framtíðinni. Hann sagði áætlanir uppi um að gefa bóluefni til annarra landa og að nú þegar hafi ein milljón skammta af AstraZeneca verið gefin til ríkja á Balkanskaga og 250.000 skammtar hafa verið gefnir til Bhutan. Einnig fengu íbúar í Slésvík-Holtsetalandi nokkra tugi þúsunda skammta frá Dönum fyrr í sumar.
