Heimsfaraldur kórónuveirunnar hefur lagst þungt á Indland og valdið miklum búsifjum. 230 milljónir landsmanna hafa lent í hópi fátækra vegna heimsfaraldursins og standa margir af fátækustu landsmönnunum nú frammi fyrir hungri.

Ekkert félagslegt öryggisnet er á Indlandi eins og víða í Evrópu og fólk því algjörlega upp á sjálft sig komið.

„Fátækustu Indverjarnir standa nú frammi fyrir tvöföldum vanda. Það er heilbrigðisvandi en einnig efnahagsvandi þar sem fólk missir tekjurnar. Margir nota sparnaðinn sinn til að kaupa lyf handa fjölskyldum sínum,“ sagði Anjali Bhardwaj hjá Right to Food Campaign samtökunum.

Þeir sem hafa minna en sem nemur um 600 íslenskum krónum á dag til að framfleyta fjölskyldum sínum teljast til fátækra.

Margir misstu vinnuna á síðasta ári, urðu að taka lán og draga úr matarneyslu sinni og síðan skall önnur bylgja faraldursins á og gerði slæmt ástand enn verra.