Fram að þessu hafa Frakkar ekki viljað bólusetja fólk 65 ára og eldra með bóluefninu frá AstraZeneca. Ástæðan er að ekki þykja liggja fyrir nægilega góðar upplýsingar um virkni bóluefnisins á eldra fólk. En nú hafa frönsk heilbrigðisyfirvöld breytt um stefnu og ætla að heimila bólusetningu fólks á aldrinum 65 til 75 ára með bóluefninu.

Dpa skýrir frá þessu. Fram kemur að nú megi bólusetja fólk á aldrinum 65 til 75 ára ef það er til dæmis með sykursýki eða of háan blóðþrýsting. Þannig bætast 2,5 milljónir manna við þann hóp sem getur fengið bóluefni AstraZeneca í Frakklandi.

Evrópska lyfjastofnunin hefur samþykkt bóluefnið til notkunar fyrir alla fullorðna en í sumum löndum hafa yfirvöld dregið línuna við 65 ára.

BBC segir að opinberar tölur í Bretlandi sýni að bólusetning með bóluefni AstraZeneca dragi úr líkunum á að fá COVID-19, sem kallar á sjúkrahúsinnlögn, um 80% hjá fólki eldra en 80 ára.

Samkvæmt upplýsingum worldometers.com er Frakkland meðal þeirra ríkja heims sem verst hafa farið út úr heimsfaraldrinum. Þar hafa rúmlega 86.000 látist af völdum COVID-19.