Ríkislögreglustjóirnn á Nýja-Sjálandi kom fram á fréttamannafundi fyrir nokkrum mínútum og ræddi stuttlega um hryðjuverkaárásirnar í Christchurh. Hann sagði meðal annars að fernt væri í haldi vegna árásanna á moskurnar tvær, þrír karlar og ein kona. Þá kom fram að lögreglan hefur fundið sprengjur á nokkrum stöðum. Ástralskir fjölmiðlar segja að allt að 27 séu látnir en lögreglustjórinn vildi ekki staðfesta það en sagði ljóst að manntjón væri mjög mikið.

Hann sagði fólki að gæta að sér og vera á varðbergi, ekki væri öruggt að hættuástandið væri yfirstaðið og hvatti hann fólk til að halda kyrru fyrir og læsa húsum. Hann sagði að lögregla og björgunarlið í borginni væru komin að þolmörkum og nú væri verið að flytja lögreglumenn flugleiðis til borgarinnar frá öðrum borgum í landinu.

Ljóst er að margar spurningar munu vakna í kjölfar árásanna en byssulöggjöfin er mjög ströng í landinu og því hljóta margir að velta fyrir sér hvernig árásarmennirnir komust yfir skotvopn og sprengiefni.