Í síðustu viku voru bresku hjónin Susan og Roger Clark handtekin í Portúgal eftir að níu kíló af kókaíni fundust í farangri þeirra. Susan er sjötug og Roger 72 ára. Þau höfðu verið í siglingu um Karabískahafið á skemmtiferðaskipi. Þegar skipið kom til Lissabon fannst kókaínið og þau voru handtekin. Verðmæti efnanna hleypur á sem nemur mörg hundruð milljónum íslenskra króna.

Breskir fjölmiðlar segja að kókaínið hafi verið í fjórum töskum í káetu hjónanna. Hjónin sigldu af stað frá Tilbury á Englandi í byrjun nóvember og var förinni heitið til Karabískahafsins og Asoreyja. Um borð voru 610 ferðamenn og 294 manna áhöfn. Þetta var ekki í fyrsta sinn sem hjónin fóru í siglingu sem þessa. Þau búa ekki í Englandi en í öðru Evrópulandi en ekki hefur verið upplýst hvaða land það er.

The Telegraph hefur eftir talsmanni portúgölsku lögreglunnar að hún hafi vitað að hverju hún var að leita þegar hún fór um borð í skipið. Talið sé að hjónin hafi tekið við efnunum á eyju í Karabískahafinu.