Knattspyrnuþjálfarinn Arnar Grétarsson skipar 3. sæti á lista Viðreisnar í Kópavogi fyrir komandi sveitastjórnarkosningar. Hann fór yfir ástæður þess í Íþróttavikunni á 433.is.

„Þetta kemur þannig til að það er leitað til mín og spurt hvort ég hafi ekki áhuga á að koma,“ sagði Arnar, sem þjálfaði síðast Fylki í Lengjudeild karla í fyrra, en hann á að baki glæstan feril sem leikmaður og þjálfari.

Það var ýmislegt sem spilaði inn í ákvörðun Arnars að taka slaginn með Viðreisn í Kópavogi.

„Í fyrra kaupi ég lóð af Kópavogsbæ, tek þátt í útboðinu á 2. áfanga uppi í Vatnsendahverfi. Ég var búinn að basla rosalega í að eiga við bæinn, fá byggingaráform samþykkt, og er enn rúmu ári síðar að baksa við það. Það er svo erfitt að ná í einhvern og fá svör.

Nú hef ég hitt ansi marga sem eru í sömu sporum og það var mikill pirringur með þetta. Það var kannski byrjunarpunkturinn á að ég læt draga mig inn í þetta. Mann langar að láta gott af sér leiða, breyta hlutum og gera þá skilvirkari. Menn eru kannski með miklar fjárfestingar og það er fljótt að hverfa ef tíminn líður, því tími er dýr í fjárfestingum.“

En af hverju Viðreisn?

„Ég á samleið með þeim í mörgu. Það er þetta með að gefa einstaklingnum frelsi til að spreyta sig og ná langt. Við viljum lága skatta, að einstaklingsframtakið blómstri en á sama tíma að velferðin sé aðeins til vinstri og að það sé hugsað um alla.“

Arnar ræðir þessi mál, ákvörðun sína um að fara út í bæjarpólitíkina og framboð Viðreisnar í Kópavogi ítarlega í spilaranum hér ofar.