Kristi Noem var vikið úr embætti heimavarnaráðherra Bandaríkjanna í mars. Engu að síður býr hún enn endurgjaldslaust í húsnæði landhelgisgæslunnar í Washington. Þetta hefur vakið athygli þar sem fyrri íbúa eignarinnar, Lindu Fagan, var hent út úr eigninni með miklum í janúar á síðasta ári.
Linda Fagan var fyrsta konan til að gegna stöðu yfirmanns hjá Landhelgisgæslunni en Donald Trump Bandaríkjaforseti vék henni úr starfi í janúar 2025, aðeins degi eftir embættistöku hans. Hún var síðar borin út úr húsnæðinu með aðeins þriggja klukkustunda fyrirvara þrátt fyrir að hafa fengið vilyrði fyrir 60 daga fresti til að finna sér nýtt húsnæði. Noem flutti inn í eignina í ágúst á síðasta ári.
Þingmaður demókrata, Robert Garcia, hefur krafið eftirmann Noem, Markwayne Mullin, um svör:
„Þessi sama ríkisstjórn henti yfirmanni úr landhelgisgæslunni út á götuna með aðeins þriggja klukkustunda fyrirvara til að rýma fyrir Noem, og jafnvel þótt Noem hafi verið rekin úr embætti vill hún ekki yfirgefa húsnæði ríkisins. Mullins ráðherra skuldar okkur svör og Noem þarf að pakka í tösku og fara.“
Garcia hefur farið fram á að eftirmaður Noem afhendi öll gögn og samskipti sem varða málið svo hægt sé að fá úr því skorið hvort hér hafi óvarlega verið farið með ríkiseign, opinbert fé eða hvort brögð séu í tafli.
Noem gefur þó lítið fyrir gagnrýnina og heldur því fram að hún sé ekki búsett í húsnæðinu sem Fagan var borin út úr. Hún sé í öðru húsnæði í eigu Landhelgisgæslunnar og borgi fyrir það fulla leigu úr eigin vasa.
