Kærunefnd jafnréttismála hefur vísað frá máli gegn bæjarstjórn Kópavogs, en ónefndum sveitarstjórnarmanni þótti það brjóta gegn jafnréttislögum að bæjarstjórn hefði ekki gætt að kynjahlutföllum við skipan í nefndir.

Gerði bæjarfulltrúinn athugasemd við að í velferðar- og mannréttindaráði væru fimm konur en aðeins tveir karlar, í menntaráði tveir karlar en fimm konur og í skipulags- og umhverfisráði fimm karlar en bara tvær konur. Bæjarfulltrúinn er ekki nafngreindur í úrskurði kærunefndar en fram kemur að viðkomandi er kona sem situr í velferðar- og mannréttindaráði. Ætla má að viðkomandi komi úr minnihluta bæjarstjórnar og koma þá aðeins tvær konur til greina, Píratinn Sigurbjörg Erla Egilsdóttir eða Vinur Kópavogs Hólmfríður Hilmarsdóttir. Sú fyrrnefnda hefur verið verulega gagnrýnin á störf bæjarstjórnar.

Bæjarstjórn Kópavogs krafðist frávísunar á málinu þar sem kærandi hefði ekki lögvarða hagsmuni af úrlausn þess. Bæjarfulltrúinn tók þá fram að hún hafi verið kosin til að sitja í velferðar- og mannréttindaráði en undir ráðið heyri jafnréttismál og framkvæmd löggjafar um jafnréttismál. Hún hafi lögvarða hagsmuni af því að farið sé eftir jafnréttislögum.

Kærunefnd rakti að samkvæmt ákvæðum sveitarstjórnarlaga um réttindi og skyldur sveitarstjórnarmanna verði ekki skilið að einstakir sveitarstjórnarmenn hafi slíka lögvarða hagsmuni af ráðstöfunum sveitarfélagsins að það jafngildi því að meint brot gegn jafnréttislögum teljist fela í sér brot gegn sveitarstjórnarmanni. Þar með hafði bæjarfulltrúinn ekki lögvarða hagsmuni af úrlausn máls og kærunni því vísað frá.

Segja má að þar sem meint brot áttu meðal annars að hafa falist í því að skipa of margar konur í velferðar- og mannréttindaráð hafi bæjarfulltrúinn í raun kært sína eigin skipan, enda er hún kona sem var skipuð í ráð með of mörgum konum.