Ásgerður Jóna Flosadóttir, formaður Fjölskylduhjálpar Íslands, segir útlit fyrir að starfsemi Fjölskylduhjálparinnar verði hætt í haust. Samtökin hafa reitt sig á matargjafir frá fyrirtækjum fyrir skjólstæðinga sína en fastur kostnaður er einnig umtalsverður og undir honum er erfitt að standa.

Má þar meðal annars nefna kostnað við leigu og vegna rafmagns, hita, reksturs bifreiðar og laun fyrir bókara, gjaldkera og endurskoðanda.

Ásgerður lýsir þessu í viðtali í Morgunblaðinu í dag þar sem hún gagnrýnir til dæmis Ingu Sæland, formann Flokks fólksins og félags- og húsnæðismálaráðherra.

Í frétt Morgunblaðsins er bent á að ýmis hjálparsamtök hefðu fengið fé úthlutað í mars síðastliðnum þegar Inga Sæland veitti styrki til samtaka sems tarfa að félags- og velferðarmálum. Fjölskylduhjálpin var ekki þar á meðal og er Ásgerður Jóna sár vegna þess.

„Hún þekk­ir starfið og veit hvað það er mik­il­vægt. Ég talaði við hana í þrígang. Í fyrsta sím­tal­inu var allt mjög já­kvætt. Svo hitti ég hana á lands­fundi Flokks fólks­ins og spurði hana um málið. Þá sagðist hún hafa lagt þetta fyr­ir rík­is­stjórn og þar hafi því verið synjað því eng­ir pen­ing­ar væru til. Í þriðja sam­tal­inu sagðist hún ekk­ert geta gert. Hún væri búin að senda er­indið inn í ráðuneytið og gæti ekki skipt sér meira af því,“ segir Ásgerður við Morgunblaðið og viðurkennir að hún sé ekki sátt.

„Við erum stærstu hjálp­ar­sam­tök lands­ins og fáum höfn­un. Auk þess erum við ein með opið bókhald. Maður er svo­lítið fúll yfir þessu.“

Ásgerður segist þó ekki ætla að gefast upp fyrr en í fulla hnefana og hefur hún sent beiðni til 600 fyrirtækja um að gerast bjargvættir Fjölskylduhjálparinnar.

Ráðherra hefur sent frá sér yfirlýsingu vegna málsins þar sem fram kemur að Fjölskylduhjálp hafi ekki fengið velferðarstyrk þar sem þau sóttu ekki um hann.

Sjá nánar: Fjölskylduhjálp Íslands fékk ekki styrk í ár því samtökin sóttu ekki um hann