Sigurbjörg Jónsdóttir, sem borin var út úr íbúð í eigu Félagsbústaða við Bríetartún á þriðjudagsmorgun, vegna vangoldinnar leigu, hefur fyrir góðvild vinkonu sinnar fengið inni á gistiheimili í Ármúla undanfarnar nætur. En frá og með morgundeginum er hún aftur á götunni.
„Ég var bara úti í rigningunni og síminn að verða batteríslaus og allt að verða blautt þegar vinkona mín frá Spáni, sem hafði fylgst með þessu, hringdi í mig, hún höndlaði þetta ekki og keypti fyrir mig á hóteli í tvær nætur og var að bæta þriðju nóttinni við. En það verður ekki á meira, en þetta var óumbeðið af mér. En á morgun er bara óvissa,“ segir Sigurbjörg í samtali við DV.
Sanna Magdalena Mörtudóttir, forseti borgarstjórnar, sagði í viðtali við Stöð 2 á þriðjudagskvöld að velferðarsvið væri að vinna í máli Sigurbjargar og myndi bjóða henni aðstoð. Sigurbjörg segir hins vegar að velferðarsvið hafi ekki haft samband við hana og hún hafi enga hjálp fengið. „Ekki nema það að félagsráðgjafinn minn sótti um styrk fyrir gistingu eina nótt en því var hafnað. Ég næ ekki í hana í dag af því það er starfsdagur.“
Sigurbjörg hefur gistingu í Ármúlanum í nótt en algjör óvissu er um hvar hún getur hallað höfði um helgina. Ekkert bólar á boðaðri aðstoð velferðarsviðs.
„Ég vona að Sanna hafi ekki verið að segja ósatt,“ segir Sigurbjörg sem bindur vonir við orð Sönnu fyrr í vikunni.
