Elín Metta Jensen hefur ákveðið að leggja skóna á hilluna. Hún tilkynnir þetta með færslu á Facebook-síðu sinni síðla kvölds í gær.

Elín er aðeins 27 ára gömul. Hún hefur sinnt læknisnámi meðfram boltanum og nú má gera ráð fyrir að einbeitingin fari þangað.

Tölfræði Elínar hvað varðar markaskorun er afar glæsileg. Hún hefur skorað 132 mörk í 183 leikjum í efstu deild með Val, þar sem hún lék allan sinn feril.

Þá á sóknarmaðurinn að baki 62 A-landsleiki fyrir Íslands hönd, þar sem hún hefur skorað sextán mörk. Þá fórhún á þrjú stórmót.

Elín lauk ferlinum á að verða Íslands- og bikarmeistari með Val á þessari leiktíð. Alls varð hún þrisvar sinnum Íslandsmeistari og tvisvar bikarmeistari með félagi sínu.

Færsla Elínar
Kæru vinir,

Ég hef ákveðið að leggja knattspyrnuskóna á hilluna.
Mér er efst í huga þakklæti til allra þeirra sem hafa lagt sitt á vogarskálarnar til að hjálpa mér að verða bæði betri knattspyrnukona og einstaklingur. Fótboltinn hefur gefið mér svo margt og svo margar gleðistundir. Nú finn ég hins vegar að það er kominn tími til að sinna öðrum hugðarefnum sem ég hef þurft að setja til hliðar á meðan ég hef sinnt fótboltanum.

Takk fyrir allt. Áfram Valur og áfram Ísland.
Elín Metta