Í síðustu viku þurfti að loka Dósaseli í Reykjanesbæ eftir að starfsmenn urðu þess varir að kakkalakkar skriðu upp úr einum dósapokanum. Meindýraeyðir var kallaður á staðinn og í framhaldinu var allt þrifið hátt og lágt.

Inga Jóna Björgvinsdóttir, forstöðumaður Dósasels, sem er móttökustöð fyrir flöskur og dósir, segir í samtali við DV að starfsfólkið hafi í fyrstu fyllst viðbjóði þegar þau sáu kakkalakkana. En í sameiningu týndu þau 10 kakkalakka af gólfinu. Inga Jóna segir þá hafa verið drapplitaða og frekar smáa en ekki svarta og stóra líkt og margir þekkja frá heitari löndum.

„Meindýraeyðirinn sagði okkur að hann færi allavega einu sinni í viku að eitra fyrir kakkalökkum í bænum,“ segir Inga Jóna að hún telur að þeir komi með búslóðum fólks sem flytur til Íslands.

„Þeir lifa ekki úti á götu eins og annarstaðar í heiminum. Heldur inni á heimilum, í geymslum og bílskúrum fólks.“

Inga Jóna segir að þau hafi ekki orðið vör við fleiri kakkalakka eftir þetta. Því sé nokkuð öruggt að sú róttæka aðgerð sem farið var í hafi skilað árangri.

Víkurfréttir greindu fyrst frá málinu þar er haft eftir Ragnari Guðleifssyni, meindýraeyði, að það hafi aukist töluvert á Suðurnesjum og víðar um landið að óskað sé eftir því að eitrað sé fyrir kakkalökkum.