Samkvæmt fréttamiðlinum 404 Media var lénið Aliens.gov skráð af framkvæmdaskrifstofu forseta Bandaríkjanna snemma í gærmorgun. Slóðin vísar þó enn ekki á virka vefsíðu og óljóst er hvaða tilgangi hún mun þjóna.
Tímasetning skráningarinnar kemur í kjölfar yfirlýsinga forsetans Donald Trump á samfélagsmiðlinum Truth Social fyrir um mánuði, þar sem hann hét því að fyrirskipa birtingu opinberra gagna sem tengjast mögulegu lífi í geimnum og fljúgandi furðuhlutum.
Eru líkur taldar á því að síðan muni gegna því hlutverk að hýsa hin ýmsu gögn sem safnað hefur verið saman í gegnum tíðina. Trump sagði að hann hygðist fela Pete Hegseth, varnarmálaráðherra sínum, og öðrum alríkisstofnunum að hefja vinnu við að greina og opinbera skjöl um það sem hann kallaði „afar áhugaverð og mikilvæg málefni“.
Sumir fjölmiðlar vestan hafs, Gizmodo og Daily Beast þar á meðal, hafa lýst efasemdum um að skráning lénsins muni leiða til raunverulegrar upplýsingagjafar um geimverur og fljúgandi furðuhluti. Gizmodo gengur svo langt að tala um að Trump sé að reyna að beina athyglinni frá erfiðum málum heima fyrir og í alþjóðamálum.
