The Guardian skýrir frá þessu og segir mjög hafi hert á þessari þróun á síðustu árum. Í mörgum af þeim bókum, sem voru bannaðar, er fjallað um efni á borð við kynþætti eða kynferði og kynlíf.
Á landsvísu hafa rúmlega 5.000 skólar neitað nemendum um aðgang að bókum í bókasöfnum sínum og skólastofum. Þetta kemur fram í skýrslu frá Pen America, sem eru samtök sem styðja tjáningarfrelsi í bókmenntum.
Segja samtökin að mikil aukning hafi orðið á skipulögðum tilraunum til að láta fjarlægja bækur. Þetta eru allt frá hægrisinnuðum stjórnmálamönnum í ríkum á borð við Texas, Georgíu og Wisconsin til að minnsta kosti 50 hópa sem hafa orðið til úti í samfélaginu eða á Facebook.
Margar bækur hafa verið bannaðar fyrir það eitt að í þeim er fjallað um fólk sem tilheyrir LGBTQ en þriðjungur allra bóka, sem lenti á bannlista frá apríl fram í júní, innihélt umfjöllun um fólk í þessum hópi. Kynþættir og umfjöllun um kynþáttahatur í Bandaríkjunum á heldur ekki upp á pallborðið hjá ritskoðurunum því 40% þeirra bóka, sem lentu á bannlistanum, fjalla um litað fólk.
Bókabönn hafa lengi verið við lýði í bandarískum skólum en Pen America segir að nú sé minna um að bönn við bókum séu tilkomin vegna kvartana frá foreldrum, nú séu það skipulagðir hópar og stjórnmálamenn sem séu áhrifamestir í þessum efnum.
