Danska ríkisútvarpið skýrir frá þessu. Stúlkan var venjulega í umsjá annarrar dagmömmu en hin ákærða hljóp í skarðið þennan dag og nokkra aðra vegna fjarveru hinnar. Pia Koudahl, saksóknari, sagði fyrir dómi í gær að það hafi legið ljóst fyrir frá upphafi að stúlkan hefði verið beitt grófu ofbeldi og að það hafi orðið henni að bana.
Dagmamman neitar sök. Hún sagði að stúlkan hefði verið hjá henni frá 25. nóvember þar sem hin dagmamman var í fríi. „Hún grét um leið og hún og faðir hennar komu í húsið. Ég hugsaði að nú væri hún að koma á nýjan stað og þá gráti börn oft,“ sagði hún.
Hún sagði að stúlkan hafi grátið allan daginn og hafi ekki róast nema þegar hún sat hjá dagmömmunni. Hún vildi ekki borða eða drekka allan daginn. Um miðjan dag lagði hún stúlkuna í barnavagn til að sofa og sendi síðan eiginmanni sínum skilaboð á Messenger: „Ótrúlega móðursjúkt barn. Hún hefur öskrað eiginlega allan tímann síðan hún kom, nú sefur hún sem betur fer.“
Hún sagði að þegar komið var með stúlkuna til hennar þann 28. hafi hún verið enn leiðari en dagana á undan. Hún sagði að um miðjan dag hafi stúlkan byrjað að lemja höfðinu við skáphurð. Hún sagðist hafa náð að svæfa hana. Þegar stúlkan vaknaði hafi hún sótt hana og lagt hana frá sér en þá hafi stúlkan reynt að standa upp en hafi skyndilega dottið á gólfið og síðan var að hennar sögn ekki hægt að ná sambandi við barnið. Hún sagðist hafa haldið að hún þjáðist af vökvaskorti og það gæti verið ástæðan. Hún hafði samband við foreldrana sem komu og sóttu stúlkuna og fóru með hana til læknis.
Stúlkan var lögð inn á sjúkrahús þar sem læknar komust að því að hún væri höfuðkúpubrotin og með innvortis blæðingar. Hún lést af völdum áverka sinna um nóttina.
Dagmamman neitaði að hafa hrist stúlkuna, lamið eða misst í gólfið. „Ég veit ekki hvernig hún fékk þessa áverka,“ sagði hún.
