Um helgina skaut indverska lögreglan tígrisdýr sem hafði fengið viðurnefnið „mannætan frá Champaran“. Talið er að dýrið hafi drepið að minnsta kosti sex manns síðasta mánuðinn og alls níu manns. Öll drápin áttu sér stað í útjaðri verndarsvæðis fyrir tígrisdýr í Champaran í austurhluta landsins.

Um 200 lögreglumenn og embættismenn tóku þátt í aðgerðinni við að fella dýrið. Lögreglumenn riðu meðal annars á fílum við leitina að dýrinu.

Meðal fórnarlamba dýrsins voru kona og átta ára sonur hennar en dýrið drap þau á laugardaginn.

Um karldýr var að ræða og var það þriggja til fimm ára gamalt.