Lík Önnu fannst við slóða í Perry Township þann 23. október 1988. Nýlega tilkynnti lögreglan að kennsl hefðu verið borin á morðingja hennar, tæpum 35 árum eftir morðið. Hann hét Scott Grim. Hann lést 2018 af eðlilegum orsökum.
DNA fannst á líkinu og fatnaði Önnu. Rannsókn leiddi í ljós að þetta var DNA úr karlmanni en ekki var vitað hverjum. 1990 birti staðardagblaðið Reading Eagle forsíðufrétt um morðið og bað almenning um aðstoð við að leysa það. Í kjölfarið barst blaðinu bréf þar undirritað af „áhyggjufullum borgara“ sem innihélt „fjölda nákvæmra upplýsinga“ um morðið. Þetta sagði Daniel Womer, lögreglumaður, á fréttamannafundi þar sem lögreglan tilkynnti að tekist hefði að finna morðingja Önnu.
Umslagið, sem bréfið var sent í, var límt aftur. Hafði verið sleikt til að líma það. Sérfræðingar tóku DNA af munnvatninu og reyndist það vera það sama og fannst á Önnu.
Fyrr á þessu ári tók erfðafræðifyrirtækið Parabon NanoLabs í Virginíu að sér að rannsaka málið en fyrirtækið hefur komið að rannsóknum á gömlum sakamálum á undanförnum árum. Rannsókn sérfræðinga þess, erfðafræðirannsókn, beindi sjónum lögreglunnar að Scott Grim sem lést 2018, 58 ára að aldri, af eðlilegum orsökum. Hann var 26 ára þegar Anna var myrt.
Sky News segir að lögreglan hafi orðið sér úti um lífsýni, DNA, úr Grim og hafi það veitt fullkomna svörun við DNA sem var á bréfinu og Önnu. Lögreglan hefur ekki skýrt frá hvernig hún varð sér úti um lífsýni úr Grim.
