Svíar tróna á toppi dapurlegs lista yfir þau Evrópuríki þar sem flestir eru myrtir með skotvopnum. 22 ríki eru á listanum en hann nær yfir tímabilið frá 2000 til 2019. Hann sýnir að almennt séð fækkaði morðum með skotvopnum á þessum tíma í Evrópu nema í Svíþjóð þar sem þeim fjölgaði mikið.

Samkvæmt frétt Sænska ríkisútvarpsins var sænska forvarnarráðinu falið að taka saman upplýsingar um morð með skotvopnum í landinu. Samantektin sýnir að árið 2000 var Svíþjóð neðst á listanum yfir þau 22 ríki sem voru höfð til samanburðar. 2018 voru þeir hins vegar á toppnum.

Frá 2013 hefur morðum, þar sem skotvopn eru notuð, farið sífellt fjölgandi í Svíþjóð. Átta af hverjum tíu morðum, sem tengjast undirheimunum, voru framin með skotvopnum. Skipulögð glæpagengi tengjast oft þessum morðum.