Réttarhöldin yfir Zhang hófust á mánudaginn og nokkrum klukkustundum síðar var dómur kveðinn upp að sögn verjanda hennar. Hún var dæmd í fjögurra ára fangelsi. The Guardian skýrir frá þessu.
Á sama tíma hófust einnig réttarhöld yfir 10 Hong Kongbúum sem eru í haldi í Kína. Þeir eru sakaðir um að hafa reynt að flýja til Taívan. Það er engin tilviljun að réttarhöldin yfir þeim og Zhang fari fram núna en það er gert til að reyna að forðast gagnrýni frá Vesturlöndum þar sem jólin eru núna í aðalhlutverki auk heimsfaraldurs kórónuveirunnar.
Í ákærunni á hendur Zhang kom fram að hún hefði sent falskar upplýsingar frá sér og birt á miðlum á borð við Twitter, YouTube og WeChat. Hún var einnig ákærð fyrir að hafa farið í viðtöl við erlenda fjölmiðla á borð við Free Radio Asia og Epoch Times þar sem hún var með vangaveltur um kórónuveirufaraldurinn í Wuhan. Fjögurra ára fangelsis var krafist yfir henni.
Zhang hefur verið fjötruð allan sólarhringinn að undanförnu og matur hefur verið neyddur ofan í hana eftir að hún fór í hungurverkfall. Lögmaður hennar segir að hún hafi lést um 15 til 20 kíló og að hár hennar hafi verið klippt stutt. Hún sé illa farin andlega, hver dagur sé eins og pynting.
Zhang neitaði öllum sakargiftum og sagði að fréttaflutningur hennar af faraldrinum hafi verið byggður á upplýsingum frá íbúum í Wuhan. Í fréttaflutningi sínum var hún oft gagnrýnin í garð kínverskra stjórnvalda og leyndarhyggju þeirra sem og ritskoðunar.
