Meirihluti Bandaríkjamanna telur að Donald Trump hafi ekki andlega getu til þess að sinna starfi Bandaríkjaforseta. Þetta kemur fram í nýrri könnun. Mikill meirihluti telur að hann hugsi ekki um afleiðingar gjörða sinna.
Þetta kemur fram í nýrri könnun Ipsos sem greint er frá í miðlinum The Hill.
Samkvæmt könnuninni telja 59 prósent Bandaríkjamanna að Donald Trump hafi ekki andlega getu til þess að sinna starfi Bandaríkjaforseta. Aðeins 40 prósent telja hann hafa hana.
55 prósent telja að Trump sé ekki í nógu góðu líkamlegu ásigkomulagi til þess að vera forseti, en hann verður áttræður í sumar. 44 prósent telja hann í nógu góðu líkamlegu ásigkomulagi.
Mikill meirihluti, 67 prósent telja að Trump hugsi sig ekki vel um áður en hann tekur mikilvægar ákvarðanir. 54 prósent telja að hann sé ekki sterkur leiðtogi.
Þá er meirihluti Bandaríkjamanna óánægður með ákvarðanir Trump og framtíðarhorfur landsins.
Til að mynda telja 50 prósent að bensínverð verði hærra á næsta ári en aðeins 21 prósent telja að það lækki. En hið misheppnaða stríð Trump í Íran hefur valdið því að olíuverð hefur rokið upp á heimsvísu.
61 prósent telja að innrás Bandaríkjanna í Íran hafi aukið hættuna á hryðjuverkum gagnvart Bandaríkjamönnum en aðeins 11 prósent að hættan hafi minnkað.
Könnunin rímar ágætlega við nýlega könnun Ipsos um vinsældir forsetans sem hafa aldrei verið minni. 62 prósent Bandaríkjanna eru óánægð með Trump og aukast óvinsældirnar sífellt. Helstu ástæðurnar eru nefndar efnahagurinn, lífskjaraskerðing og verðbólga.
76 prósent telja að Trump sé ekki að takast á við versnandi lífskjör Bandaríkjamanna og 66 prósent eru óánægð með stríðið í Íran.
