Kenningin er að níkótín veiti vernd gegn kórónuveirunni en vísindamenn eru ekki á eitt sáttir um þessa kenningu. Samkvæmt frétt The Guardian þá var fyrrgreind rannsókn gerð á stóru sjúkrahúsi í París. Hún náði til 480 sjúklinga sem höfðu greinst með COVID-19. 350 þeirra lágu á sjúkrahúsi en hinir voru heima.
Í öðrum hópnum var miðgildi aldurs þátttakenda 65 ár. 4,4 prósent þeirra sögðust reykja að staðaldri. Í hinum hópnum var miðgildi aldurs þátttakenda 44 ár. 5,3 prósent þeirra sögðust reykja reglulega. Vísindamennirnir báru þessar tölur saman við hlutfall reykingafólks í samfélaginu. Í aldurshópnum 44 til 53 ára er hlutfall reykingafólks um 40 prósent og 8,8 til 11,3 prósent hjá fólki á aldrinum 65 til 75 ára.
Vísindamennirnir taka skýrt fram að þeir hvetja fólk alls ekki til að byrja að reykja því margvísleg heilsufarsleg áhætta fylgi því. Þess utan séu meiri líkur á að reykingafólk, sem smitast af COVID-19, veikist alvarlega af völdum veirunnar.
The Guardian segir að í mars hafi kínversk rannsókn, sem var birt í vísindaritinu New England Journal of medicine, sýnt næstum sömu niðurstöðu og sú franska um hlutfall reykingafólks sem smitast af COVID-19.
Bandarísk rannsókn, sem var birt 18. mars, sýnir að nikótín örvi frekar getu kórónuveirunnar til að láta að sér kveða í líkama fólks en að það dragi úr getu veirunnar til þess.