Sjö ára stúlka frá Gvatemala lést af völdum vökvaskorts og áfalls átta klukkustundum eftir að bandarískir landamæraverðir stöðvuðu för hennar og föður hennar í Nýju Mexíkó þann 6. þessa mánaðar.

The Washington Post skýrir frá þessu. Segir blaðið að feðginin hafi verið handsömuð af landamæravörðum nærri Lordsburg í Nýju Mexíkó en þau voru í hópi 163 flóttamanna.

Ekki liggur ljóst fyrir hvað kom fyrir stúlkuna á þessum átta klukkustundum sem liðu frá því að landamæraverðir handsömuðu hana og þar til hún lést. Hún fékk skyndilega mörg köst og var flogið með hana á sjúkrahús í El Paso í Texas þar sem hún lést.

Í yfirlýsingu frá bandaríska landamæraeftirlitinu kemur fram að stúlkan hafi hvorki fengið vott né þurrt dögum saman.