Írönsk stjórnvöld tilkynntu fyrir stundu að búið væri að opna fyrir alla skipaumferð um Hormússund. Þessi ákvörðun var tekin í kjölfar vopnahlés á milli Ísraels og Líbanon.

Í færslu á samfélagsmiðlinum X segir Abbas Araghchi, utanríkisráðherra Írans, að siglingar fari fram eftir fyrir fram skilgreindri leið sem yfirvöld í Íran hafa þegar kynnt.

Hormússund er ein mikilvægasta flutningaleið olíu í heiminum og hefur verið lokað að verulegu leyti undanfarnar vikur. Hafa margir viðrað áhyggjur sínar af yfirvofandi eldsneytisskorti og að flugsamgöngur gætu lamast á næstu vikum.

„TAKK FYRIR,“ skrifaði Donald Trump Bandaríkjaforseti á samfélagsmiðilinn Truth Social eftir að ákvörðunin lá fyrir.

Verð á hráolíu hefur lækkað verulega eftir tilkynningu Araghchi. Í frétt BBC er bent á að í kjölfar tilkynningarinnar hafi verð á Brent-hráolíu farið niður fyrir 90 dali á tunnu, eftir að hafa verið yfir 98 dalir í morgun.

Verð á svokallaðri NYMEX light sweet hráolíu, sem er viðmið í Bandaríkjunum, lækkaði einnig töluvert.

Fyrir átökin var Brent-hráolía seld á tæplega 70 dali á tunnu. Verðið fór yfir 100 dali í byrjun mars og náði hámarki í 119 dollurum.

Hlutabréfamarkaðir í Evrópu og Bandaríkjunum hafa einnig tekið við sér eftir tilkynninguna. CAC-vísitalan í París og DAX-vísitalan í Frankfurt hækkuðu báðar um rúmlega 2%. Í London var hækkun FTSE-vísitölunnar hóflegri, eða um 0,5%. Í Bandaríkjunum, á fyrstu mínútum viðskipta, hækkaði Dow Jones-vísitalan um 1,3% og S&P 500 um 0,7%.