Segja má að flugvél United Airlines hafi breyst í leiksvæði án eftirlits eftir að þrjú hávær börn voru skilin eftir án forráðamanna á almennu farrými. Foreldrar barnanna sátu á fyrsta farrými í vélinni sem var á leið frá Houston í Texas til Fort Lauderdale í Flórída.

„United býður nú upp á ókeypis barnapössun,“ sagði einn farþegi um það sem hann kallar undarlega upplifun í færslu sinni á Reddit.

Samkvæmt færslunni sátu börnin, sem farþeginn telur að hafi verið sjö, níu og tíu ára „í áttundu röð fyrir aftan salernið“. Taldi hann því að foreldrarnir hefðu verið uppfærðir í fyrsta farrými og virtust njóta hvíldar frá börnum sínum um borð.

Börnin höguðu sér vel meirihluta flugsins fyrir utan „venjuleg barnalæti“, þar á meðal „hávært tal, leikföng og teppi alls staðar, að skipta um sæti.“ „Pabbinn kom meira að segja til að athuga með þau í miðju flugi,“ sagði farþeginn.

Hálftíma fyrir lendingu varð allt brjálað að hans sögn. Drengirnir fóru að „berja hvor í annan og tala svo hátt að það virtist eins og þeir væru að öskra. Á meðan var svo mikill slaki í öryggisbeltinu hjá litla stúlkunni að hún gat gengið frjáls í beisli eins og hundur í taumi.

Og það var ekki allt, samkvæmt farþeganum sem sagðist sitja hinu megin við ganginn. „Þá kom einhvers konar hávær barsmíð á hnén og söngur rétt fyrir lendingu á meðan fullt af dóti var enn á gólfinu við klósettvegginn. Fjórar raðir af farþegum voru órólegar og ruglaðar yfir því sem var að gerast, á meðan starfsfólkið í farþegarýminu virtist ekki taka eftir því.“

„Ég held að spurningin mín sé … hvað í ósköpunum?“ sagði farþeginn.  „Foreldrarnir fengu uppfærslu og fengu rólegt og afslappað flug á meðan aðrir þurftu að fylgjast með eftirlitslausum börnum. Hvenær hefði starfsfólkið átt að grípa inn í og ​​biðja foreldrana að koma sér fyrir til að hafa eftirlit með börnunum sínum?“

Færslan vakti athygli og umræður og einn notandi var á því að reglan væri: „Ef engir foreldrar eru nálægt má öskra á börn sem haga sér illa. Það er pottþétt regla..“

„Það eru til tvær gerðir af foreldrum: þeir sem eru í raun foreldrar og svo þeir sem eru ekkert annað en slæmir umsjónarmenn sem vilja stimpla sig út þegar vaktinni þeirra er lokið,“ sagði annar reiður. „Þetta er ekki einu sinni kynslóðamál.“

Þriðji kallaði ákvörðun foreldranna „djöfullega“. „Ef boðið er upp á uppfærslu þarf annað foreldrið að vera hjá börnunum og barn fær uppfærslu eða enginn fær uppfærslu. Sumir geta verið svo eigingjarnir.“

Bandarísk flugfélög eru ekki löglega skyldug til að setja fjölskyldur saman í sæti, þó að mörg flugfélög taki að sér að tryggja að öll ólögráða börn séu í fylgd með fullorðnum um borð, samkvæmt The Points Guy. Þýðir þetta að í mörgum tilfellum geta börn verið aðskilin frá forráðamönnum sínum ef sætisskipti eða uppfærsla eiga sér stað, eitthvað sem hefur hent marga farþega sem ferðast með börn.