Breska ríkisútvarpið, BBC, fjallar um þetta.
Rannsóknir í svokölluðum Wogan-helli hafa þegar leitt í ljós sjaldgæf ummerki um bæði frumstætt mannlíf og dýralíf.
Þar á meðal hafa fundist bein úr flóðhesti sem lifði á svæðinu fyrir um 120.000 árum, auk leifa af mammútum og loðnashyrningum.
Þótt uppgröftur hafi hingað til verið takmarkaður hafa niðurstöðurnar vakið töluverða athygli. Nú stendur til að hefja umfangsmikið, fimm ára rannsóknarverkefni undir stjórn vísindamanna við University of Aberdeen.
Að sögn fornleifafræðingsins Rob Dinnis, sem leiðir verkefnið, er um einstakan stað að ræða. „Það er enginn annar staður eins og þessi í Bretlandi – þetta er uppgötvun sem gerist aðeins einu sinni á ævinni,“ segir hann við BBC.
Hellirinn, sem er um 23 metra langur og allt að 10 metra hár, er aðgengilegur með hringstiga úr kastalanum. Lengst af var talið að lítið væri eftir af fornleifum á svæðinu, en rannsóknir á árunum 2021 til 2024 breyttu þeirri mynd. Fundust meðal annars steinverkfæri og bein sem þykja hafa varðveist óvenju vel.
Vísindamenn telja að hellirinn geti veitt sjaldgæfa innsýn í líf fyrstu nútímamanna í Bretlandi, sem og mögulega enn eldri búsetu Neanderdalsmanna. Þá gætu fundirnir einnig varpað ljósi á áhrif loftslagsbreytinga á mannlíf, þar sem leifarnar spanna bæði ísaldir og hlýrri skeið í mannkynssögunni.
Rannsóknarverkefnið er unnið í samstarfi við Pembroke Castle Trust, sem hyggst tryggja að það sem finnst á staðnum verði vel varðveitt.
Pembroke-kastali er sögufrægur en þar fæddist meðal annars Henry VII sem var Englandskonungur á árunum 1485 til 1509.
