Halla Bergþóra Björnsdóttir, lögreglustjóri á höfuðborgarsvæðinu, hefur verið skipuð ríkislögreglustjóri. Þetta kemur fram í tilkynningu Stjórnarráðsins.

„Þorbjörg S. Gunnlaugsdóttir, dómsmálaráðherra, hefur skipað Höllu Bergþóru Björnsdóttur, lögreglustjóra á höfuðborgarsvæðinu, í embætti ríkislögreglustjóra. Hún tekur við embætti mánudaginn 20. apríl,“ segir í tilkynningu Dómsmálaráðuneytisins.

Halla Bergþóra er 56 ára. Hún hefur verið lögreglustjóri á höfuðborgarsvæðinu síðan 2020 en áður var hún lögreglustjóri á Norðurlandi eystra.

„Halla Bergþóra hefur sem lögreglustjóri leitt umfangsmikil verkefni, verið farsæll stjórnandi og stýrt stórum hópi starfsfólks hjá ólíkum lögregluembættum. Halla Bergþóra var formaður lögreglustjórafélagsins á þeim tíma sem lögreglustjóraembættin voru stofnuð, kom að þeirri vinnu í samstarfi við ráðuneytið og átti þátt í að móta nýtt embætti frá grunni,“ segir í tilkynningunni.