Karlmaður um þrítugt var fluttur á bráðamóttökuna í Fossvogi á laugardagsnótt eftir átök við dyraverði á næturklúbbnum Auto við Lækjargötu. „Þetta var algjörlega tilefnislaus árás dyravarðanna, þeir héldu að hann hefði kastað einhverri flösku eða eitthvað, sem hann gerði ekki,“ segir heimildarmaður DV.
Viðkomandi lýsir því að maðurinn hafi þvínæst verið umkringdur nokkrum Albönum, honum virtust þeir um sex talsins, og hafi þolandinn verið barinn illa. „Þeir gjörsamlega lúberja hann þangað til hann getur ekki staðið í lappirnar, hann bara ældi og gat ekki talað, hann fékk líka höfuðáverka,“ segir viðkomandi enn fremur.
Samkvæmt heimildum nýtir Auto sér þjónustu hjá albönsku dyravarðarfyrirtæki, eins og fleiri skemmtistaðir í miðborginni.
Heimildarmaðurinn segir að lögregla hafi komið á staðinn og maðurinn hafi verið fluttur á bráðamóttöku. Hann hafi verið mjög illa farinn en hafi þó sofið heima hjá sér, hann hafi verið sendur heim með verkjalyf. Hann hyggst leggja fram kæru í málinu og er hann búinn að óska eftir tíma hjá kærumóttöku lögreglunnar.
Unnar Már Ástþórsson, aðalvarðstjóri hjá lögreglunni á höfuðborgarsvæðinu, staðfestir í samtali við DV að atvikið hafi átt sér stað. „Þetta gerðist aðfaranótt laugardagsins 20. desember. Það er einn árásarþoli þarna sem sagðist hafa orðið fyrir áverkum vegna afskipta dyravarða. Hann var síðan fluttur á sjúkrahús með áverka.“
Aðspurður segir Unnar að enginn hafi verið handtekinn vegna málsins, en: „Málið er bara í rannsókn hjá okkur og það er beðið eftir kæru.“
Ekki náðist samband við forsvarsmenn Auto við vinnslu fréttarinnar en greint verður frá viðbrögðum þeirra síðar ef þau berast.
