Hæstiréttur hefur staðfest dóm Landsréttar yfir Najeb Mohammad Alhaj Husin sem hafði verið dæmdur í fimm ára fangelsi fyrir kynferðisbrot gegn stúlku undir lögaldri. Najeb, sem var starfsmaður grunnskóla í bæjarfélagi á Norðurlandi, hafði ítrekað samræði við 14 ára stúlku sem var nemandi við skólann. Brotin stóðu yfir í um tvo mánuði og kom fram á öllum dómstigum að stúlkan glímdi við mikla vanlíðan eftir brotin.
ajeb var einnig sakfelldur fyrir að hafa haft barnaníðsefni í fórum sínum en þar var um að ræða kynferðislega ljósmynd af brotaþolanum.
Fyrir Héraðsdómi Norðurlands eystra árið var Najeb sakfelldur fyrir kynferðisbrot sem fólst í samræði við barn undir 15 ára aldri. Brotin voru ýmist framin í húsnæði grunnskólans, í bíl sakborningsins eða á heimili hans. Hann var einnig sakfelldur fyrir að hafa haft barnaníðsefni í fórum sínum, kynferðislegar ljósmyndir af stúlkunni. Hins vegar var hann sýknaður af ákæru um nauðgun og var niðurstaðan þriggja og hálfs árs fangelsisdómur.
Landsréttur taldi hins vegar að Najeb hefði með athæfi sínu gerst sekur um nauðgun og var hann því einnig sakfelldur fyrir þann ákærulið. Það þýddi að dómurinn var þyngdur upp í fimm ára fangelsi.
Najeb fékk leyfi til þess að áfrýja málinu til Hæstaréttar, í ljósi þess að það væri fordæmisgefandi. Niðurstaðan varð í stuttu máli sú að Hæstiréttur staðfesti niðurstöðu Landsréttar.
Auk fimm ára fangelsisvistar þarf Najeb að greiða 1.696.218 krónur í áfrýjunarkostnað en áður hafði hann verið dæmdur til að greiða stúlkunni 3,5 milljónir króna í miskabætur.
Najeb kom hingað til lands sem hælisleitandi frá Sýrlandi. Hann flutti í bæjarfélagið þar sem hann framdi brotin árið 2009. Hann er giftur konu sem einnig er hælisleitandi. Þess má geta að Najeb var rúmlega þrítugur þegar brotin voru framin en brotaþoli var 14 ára.
