Kristrún Frostadóttir segir hótanir Donald Trump Bandaríkjaforseta í garð Grænlands alvarlegar fyrir Ísland. Smáríki eigi allt undir alþjóðalögum og að landamæri séu virt.
Kristrún fundaði með Urusulu von der Leyen, forseta framkvæmdastjórnar Evrópusambandsins, og Antonio Costa, forseta Evrópuráðsins, í Brussel í gær. Einnig var hún í viðtali við samevrópsku sjónvarpsstöðina Euronews.
Í viðtalinu var meðal annars rætt um stöðuna á Grænlandi og ógnina sem berst nú þaðan úr vestri, frá Bandaríkjunum og Donald Trump sem vill leggja eyjuna undir sig og hefur ekki útilokað að beita hervaldi til þess.
„Við erum norðurheimskautsþjóð. Norðurheimskautið er heimili okkar,“ sagði Kristrún í viðtalinu og ítrekaði mikilvægi þessa máls fyrir Ísland. „Fyrir okkur er þetta ekki aðeins hugtak í alþjóðasamskiptum. Þetta er staðurinn sem við búum á og þess vegna veldur þetta okkur miklum áhyggjum.“
Sagði Kristrún að ummæli sem Trump og varaforseti hans, J.D. Vance, hafa látið falla að undanförnu væru ekki sæmandi. Einnig hefði hún áhyggjur af auknum áhuga Rússa á norðurslóðum.
„Lítil lönd eins og Ísland eiga allt undir alþjóðalögum og að landamæri séu virt,“ sagði Kristrún. Heilt yfir hafi norðurheimskautið verið friðsælt svæði. „En við getum ekki verið barnaleg og afneitað því að það eru miklir hagsmunir í húfi.“
Aðildarumsókn Íslands að Evrópusambandinu og fyrirhuguð atkvæðagreiðsla um hana voru einnig til umræðu í viðtalinu. Meðal annars var Kristrún spurð hvort að Íslendingar myndu finna fyrir meira öryggi að vera hluti af Evrópusambandinu.
„Ég vil ekki keyra aðildarviðræður okkar á ótta,“ sagði Kristrún. „Við ættum að ganga í Evrópusambandið sem hluta af stærri mynd.“
Vissulega væri ekki hægt að neita því að öryggismál væru hluti af heildarmyndinni.
„Vitaskuld munu öryggismál verða á döfinni. Og við sjáum fyrir okkur miklar breytingar á komandi vikum og mánuðum sem geta haft áhrif á þau,“ sagði Kristrún.
