Bandaríkjamaður sem er með ferðalag til Íslands áætlað í sumar er orðinn efins um að koma vegna framferðis Donald Trump, nýkjörins forseta. Óttast hann að Íslendingar bjóðir ekki Bandaríkjamenn velkomna lengur.
„Við erum með löngu áætlaða ferð til Íslands í nokkrar vikur í ágúst. Í ljósi undanfarinna atburða í bandarískum stjórnmálum, sem mun líklega ekki skána, erum við enn þá velkomin?“ spyr Bandaríkjamaðurinn á síðu ferðamanna á Íslandi á samfélagsmiðlinum Reddit.
Tekur hann það skýrt fram að hann sé ekki stuðningsmaður Trump.
„Mörg okkar eru andvíg því sem er að gerast í Bandaríkjunum, en það er skiljanlegt að við séum öll sett undir sama hatt sem ljótir Bandaríkjamenn,“ segir hann.
Veltir hann því fyrir sér hvort það sé ekki betra að fresta ferðinni og vonast til betri tíðar eftir nokkur ár.
Flest svörin eru hins vegar á eina vegu. Það er að hvorki hann né aðrir bandarískir ferðamenn verði dæmdir fyrir það sem forsetinn þeirra og stjórnvöld eru að gera.
„Það er ólíklegt að þú munir upplifa nein leiðindi út af þessu,“ segir einn netverji í athugasemdum.
„Nema að þú sért með MAGA derhúfu þá munu Íslendingar sennilega álykta að þú sért að reyna að flýja land,“ segir annar.
Einn Kanadamaður segir að eftir að Trump var kjörinn í fyrsta skipti, árið 2016, hafi hann fengið vorkunn á ferðalögum sínum frá fólki sem hélt að hann væri Bandaríkjamaður. Meðal annars í verslun í Amsterdam þar sem hann hafi fengið afslátt.
Ekki eru þó allar raddir á einu máli.
„Vanalega myndi ég vera sammála en ef þessi geðsjúklingur ræðst inn í Grænland þá mun það vekja upp tilfinningar hjá mér,“ segir hann.
