Illugi Jökulsson, rithöfundur og blaðamaður, segir að það ætti að vera fyrsta sparnaðarleið Kristrúnar Frostadóttur forsætisráðherra að leggja niður mannanafnanefnd. Nefndin sé komin út fyrir sitt svið.

„Eina mögulega réttlætingin fyrir mannamannanefnd á vegum ríkisins — og hún er þó ekki sterk — er að koma í veg fyrir að fólk skíri börnin sín einhverjum algjörum skrípanöfnum eins og Hálfviti eða Kúkafýla,“ segir Illugi í færslu á samfélagsmiðlum.

Ástæðan er frétt Vísis um að Mannanafnanefnd hafi hafnað beiðni um að leyfa kvenkyns eiginnafnið Hrafnadís.

Fréttir af úrskurðum Mannanafnanefndar eru reglulegar í íslenskum fjölmiðlum og sitt sýnist hverjum um þær ákvarðanir. Í þetta skipti ber nefndin fyrir sig að nafnið Hrafnadís brjóti í bága við íslenskt málkerfi og sé afbökun á nafninu Hrafndís.

Mörg nöfn endi á -dís en ekkert þeirra sé með forlið í eignarfalli fleirtölu. Á þessu sé ein undantekning, Vanadís, sem sé þó ekki nóg til að skapa fordæmi.

Finnst Illuga að nefndin sé augljóslega komin út fyrir sitt hlutverk. Heldur hann áfram.

„En að einhver nefnd úti í bæ sé að setja á langhund um stofnsamsetningu og eignarfall fleirtölu til að réttlæta að foreldrar megi ekki skíra dóttur sína Hrafnadís, það er náttúrlega prýðileg sönnun þess að það ætti að vera fyrsta sparnaðarleið Kristrúnar Frostadóttur að leggja niður þessa idjótísku nefnd,“ segir hann.