Sigurður Kristinsson tónlistarmaður lést í gær 22. júlí. Sigurður var þekktastur fyrir að vera einn af upprunalegum meðlimum Sniglabandsins.
Fjöldi tónlistarmanna minnast Sigurðar á samfélagsmiðlum í dag. Sigurður lék upphaflega á trommur með Sniglabandinu en færði sig svo yfir á gítarinn.
Á meðal þeirra sem minnast hans eru Guðmundur Jónsson, gítarleikari Sálarinnar hans Jóns míns. Guðmundur segir Sigurð hafa verið frábæran rokkgítarleikara sem elskaði græjur og gítarstúss.
„Leitaði ég oft til hans með ráðleggingar í tæknimálum allskonar enda var hann dellukall mikill og jafnan boðinn og búinn að hjálpa til,“ segir Guðmundur. „Ég vissi af veikindum Sigga um hríð og það hryggir mig að vita að þau skyldu hafa endað á versta veg.“
Tónlistarmaðurinn Rúnar Þór minnist einnig Sigurðar. „Sigurður Kristinsson er fallinn frá, frábær tónlistarmaður gítarleikari, þegar mig vantaði bassaleikara með mér til Spánar kom hann með og var frábær á bassann og félagi, farðu í friði vinur.“
Sniglabandið gaf einnig út minningarkveðju um stofnmeðliminn. „Siggi var stór og litríkur karakter. Sum uppátæki hans voru með algjörum ólíkindum og sögurnar ótrúlegar. Hann var gríðarlega hæfileikaríkur á mörgum sviðum, það var nánast sama hvað hann tók sér fyrir hendur. Innan skamms var hann búinn að afla sér allrar þekkingar og kominn í fremstu röð á viðkomandi sviði,“ segir í færslu frá hljómsveitinni.
Sigurður lætur eftir sig eiginkonu, tvö yngri börn og þrjár uppkomnar dætur.
