Læknarnir Einar Stefánsson og Gestur Pálsson skrifa athyglisverða grein í Morgunblaðið í dag þar sem þeir viðra áhyggjur sínar af áætlunum um stækkun hjúkrunarheimilisins Sóltúns.

„Hjúkr­un­ar­heim­ilið Sól­tún í Reykja­vík hef­ur verið starf­rækt í friðsælu um­hverfi und­an­far­in 22 ár. Í Sól­túni er friður og ró og gott að búa. Þar dvelja heila­bilaðar eig­in­kon­ur okk­ar koll­eg­anna og hafa notið góðrar aðhlynn­ing­ar og at­læt­is und­an­far­in miss­eri. Nú eru hins veg­ar blik­ur á lofti. Áætlan­ir gera ráð fyr­ir að byggja eigi við hjúkr­un­ar­heim­ilið, bæta 64 her­bergj­um við þau 92 sem fyr­ir eru, byggja nýja hæð ofan á húsið og lengja álm­ur. Aug­ljós­lega mun þurfa að rífa þakið af hús­inu og stál­grind­ur bruna­stig­anna í und­ir­bún­ingi fyr­ir fram­kvæmd­ir, sem eiga að hefjast í haust og standa í 24 mánuði.“

Í grein sinni segja Einar og Gestur að þetta eigi að gerast með íbúa hjúkrunarheimilisins í húsinu.

„Bygg­ing­ar­fram­kvæmd­um fylg­ir hávaði og rask. Flest­ir kann­ast við óþæg­indi af húsaviðgerðum og fæst­ir leggja á sig að búa eða vinna í húsi sem er í bygg­ingu eða meiri­hátt­ar viðgerðum,“ segja þeir kollegar og benda á að heila­bilaðir sjúk­ling­ar séu sér­stak­lega næm­ir fyr­ir hávaða og ónæði, meðal annars vegna þess að þeir gera sér ekki grein fyr­ir or­sök­um og venj­ast ekki áreiti vegna minn­is­leys­is.

„Okk­ar heila­biluðu ást­vin­ir og aðrir íbú­ar í Sól­túni munu enga björg sér geta veitt. Þau munu ekki skilja ástæður skarkalans og ann­ars umróts, held­ur upp­lifa það sem nýja ógn og óþæg­indi á hverj­um degi. Þau kom­ast ekki und­an, enda bund­in við hjóla­stól og al­ger­lega upp á aðstoð starfs­fólks­ins kom­in við all­ar at­hafn­ir daglegs lífs. Kvíði, hræðsla og skelf­ing munu verða eins og mar­tröð mánuðum og miss­er­um sam­an og flest­ir sjúk­ling­anna munu eiga sín­ar síðustu stund­ir við þess­ar aðstæður. Lífs­lík­ur sjúk­linga sem leggj­ast inn á hjúkr­un­ar­heim­ili eru að meðaltali um tvö ár, sem er sama og áætlaður fram­kvæmda­tími.“

Í grein sinni segja Einar og Gestur að þetta sé í hróp­andi mót­sögn við yf­ir­lýst gildi Sól­túns, en þau kveði meðal annars á um virðingu fyr­ir einka­lífi íbúa og að komið sé fram við íbúa af skiln­ingi og nær­gætni. Einnig að lagður sé grunn­ur að and­legri vellíðan og haldið í gleðina í dag­legu lífi.

„Það gef­ur auga­leið að ekki verður mögu­legt fyr­ir starfs­fólk Sól­túns að fylgja þess­um gild­um meðan á fram­kvæmd­um stend­ur. Óhætt er að full­yrða að fyr­ir­hugaðar fram­kvæmd­ir í Sól­túni eru ekki í sam­ræmi við leiðbein­ing­ar um umönn­un og meðferð heila­bilaðra.“