„Það er 2024 og við erum stödd þarna. Við erum að tala um virði starfa og að launa­setja störf. Fé­lagið á að standa vörð um rétt­indi og kjör hjúkr­un­ar­fræðinga og því för­um við þessa leið,“ segir Guðbjörg Pálsdóttir, formaður Félags íslenskra hjúkrunarfræðinga, í samtali við Morgunblaðið í dag.

Blaðið greinir frá því í dag að for­stöðuhjúkr­un­ar­fræðing­ar á tveim­ur sviðum Land­spít­alans fá greidd ríf­lega 150 þúsund krón­um lægri laun en for­stöðulækn­ar á sömu sviðum. Bent er á það að allir hjúkr­un­ar­fræðing­arn­ir séu kven­kyns en lækn­arn­ir karl­kyns og öll heyri undir framkvæmdastjóra sviðanna. Framkvæmdastjórarnir eru ýmist læknar eða hjúkrunarfræðingar og fá allir greidd sömu laun.

Þetta er Félag íslenskra hjúkrunarfræðinga ósátt við og telur að um ólögmætan kynbundinn launamun sé að ræða. Hefur félagið sent inn kæru til Kærunefndar jafnréttismála.

Guðbjörg segir í samtali við Morgunblaðið að umgjörð starfanna, ábyrgð, skyldur og starfssvið sé það sama. „Þau leystu hvert annað af í sumar,“ segir hún.

Landspítalinn hefur frest til 6. nóvember næstkomandi til að skila greinargerð vegna kærunnar.