Í dag var greint frá því að Stefán Eiríksson hefði verið endurráðinn útvarpsstjóri Ríkisútvarpsins til næstu fimm ára. Næstum helmingur stjórnarinnar vildi auglýsa stöðuna.
Ingvar Smári Birgisson, lögmaður og varaformaður í stjórn RÚV, greinir frá atkvæði sínu í færslu á samfélagsmiðlum núna í kvöld. En hann var einn af fjórum stjórnarmönnum sem vildu auglýsa stöðu útvarpsstjóra lausa.
„Stjórn Ríkisútvarpsins tók nú á dögunum ákvörðun með minnsta mögulega meirihluta um að endurráða útvarpsstjóra án auglýsingar,“ segir Ingvar Smári, sem var áður formaður Heimdallar og SUS.
„Ég var á þeirri skoðun, ásamt þremur öðrum stjórnarmönnum (samtals 9 í stjórninni), að með réttu hefði átt að auglýsa stöðuna, enda samræmast slík vinnubrögð best þeim gagnsæju vinnubrögðum sem þurfa að einkenna störf Ríkisútvarpsins,“ segir Ingvar Smári.
Hinir sem vildu fara þessa leið voru Diljá Ámundadóttir Zoega, Rósa Kristinsdóttir og Marta Guðrún Jóhannesdóttir.
Létu þau bóka:
„Sú leið að auglýsa stöðu útvarpsstjóra samræmist best þeim gagnsæju vinnubrögðum sem þurfa að einkenna störf Ríkisútvarpsins. Með því að auglýsa stöðuna má auka traust og tiltrú almennings gagnvart stofnuninni til framtíðar.“
Fimm stjórnarmenn samþykktu að endurráða Stefán. Það voru formaðurinn Silja Dögg Gunnarsdóttir, Mörður Áslaugarson, Margrét Tryggvadóttir, Aron Ólafsson og Þráinn Óskarsson.
Málið var tekið fyrir á stjórnarfundi þann 25. september og þá töldu stjórnarmenn sig þurfa frekari upplýsingar um hvort þeir myndu nýta heimild í lögum til að endurráða Stefán, sem var skipaður til fimm ára í janúar árið 2020.
Var því aukafundur haldinn þann 3. október þar sem Stefán var beðinn að senda stjórn greinargerð um áherslur sýnar og framtíðarsýn fengi hann umboð til þess að stýra stofnuninni áfram. Það gerði hann og samþykktu stjórnarmennirnir fimm að endurráða hann á fundi 17. október. Málið verður þó formlega afgreitt á stjórnarfundi RÚV þann 30. október.
Stefán, sem áður var lögreglustjóri á höfuðborgarsvæðinu og borgarritari Reykjavíkurborgar, hafði greint frá því að hann myndi hætta sem útvarpsstjóri að loknum skipunartíma sínum. Bjuggust þá sumir við því að hann hygði á feril í stjórnmálum.
