Þorsteinn Siglaugsson, ráðgjafi og sérfræðingur í hagnýtingu gervigreinar, fékk ChatGP til að skrifa fyrir sig stutta heimspekiritgerð. Hann bað síðan kunningja sinn, sem er prófessor í heimspeki, til að lesa ritgerðina yfir og leggja mat á hana, þ.e. láta sig vita hvaða einkunn hann gæfi fyrsta árs nemanda fyrir þessi skrif. Svarið var 5,0 og því myndi ritgerðin ná lágmarkseinkunn.

Þetta kemur fram í grein Þorsteins á Vísir.is.

Þorsteinn segir mikilvægt að innleiða gervigreind inn í skólakerfið og til að hagnýta sér gervigreind við ritgerðaskrif og úrlausn verkefna þurfi nemendur að hafa til að bera góða þekkingu á viðfangsefninu og sterkan málskilning:

„Til að nota gervigreind með árangursríkum hætti er nauðsynlegt að hafa góð tök á viðfangsefninu og geta orðað eigin hugsun bærilega skýrt. Útkoman ræðst af því hversu vönduð og skýr skipunin er og af færni notandans í að leggja mat á útkomuna og eiga samskipti við gervigreindarlíkanið í framhaldinu til að bæta hana og fínpússa. Er þessi hæfni ekki einfaldlega nokkuð sem nauðsynlegt er að efla með nemendum?“

Þorsteinn segir að með tilkomu gervigreinarinnar verði málskilningur, orðaforði og skýr hugsun mikilvægari þættir en áður:

„En nú þegar gervigreindin hefur hafið innreið sína í skólakerfið af fullum þunga er lykilatriði að þegar samræmt námsmat er útfært verði hæfni í notkun hennar einn þeirra lykilþátta sem mældir eru. Og þá er mikilvægt að hafa í huga að hæfni í notkun gervigreindar er bein afleiðing af málskilningi og hæfni til málnotkunar. Kannski væri réttast í stað þess að auka áherslu á vísinda- og tækninám (STEM greinar) eins og mikið hefur verið rætt undanfarið, að gera fremur tungumálanám, bókmenntir og heimspeki að þungamiðju námsins? Málskilningur, orðaforði og skýr hugsun eru nefnilega grundvallaratriði þegar að því kemur að nýta gervigreind. Getur þá ekki sá sem hefur þetta á valdi sínu sem best látið hana sjá um líkanagerðina og útreikningana? Þessari spurningu er vert að velta fyrir sér.“

Sjá nánar á Vísir.is