Rafmagnsgirðing sem var stolið af Kjósarhreppi er komin í leitirnar. Stóð hún við jörð sem tveir menn hafa deilt hart um og girðing hefur áður verið tekin niður. Kjósarhreppur segir að þjófurinn þurfi að gera sér grein fyrir óafturkræfum afleiðingum gjörða sinna.
DV greindi frá því 11. júlí að 400 metra girðing, sem stendur ofan við Hvalfjarðarveg við jörðina Þúfukot hefði verið stolið. Jóhanna Hreinsdóttir oddviti sagði girðinguna hafa verið setta upp til að varna hrossum frá því að komast niður á þjóðveg. Það væri mikilvægt fyrir umferðaröryggi.
Miklar deilur hafa staðið um Þúfukot, það er um 25 hektara spildu, sem tveir menn í sveitinni telja sig báðir eiga. Hefur sérsveitin verið kölluð til í þessum deilum og dómsmálaráðherra þurft að skipta sér að henni.
Nú er girðingin komin í leitirnar. Eins og segir í tilkynningu frá Kjósarhreppi var girðingin rifin niður og kastað ofan í nærliggjandi skurð.
„Hver sá sem gerði þetta þarf að gera sér grein fyrir mögulegum óafturkræfum afleiðingum af slíku athæfi,“ segir í harðorðri tilkynningunni. „Umferð hefur aukist mikið á Hvalfjarðarvegi og þar með umferð hópferðabíla. Nú þegar rökkva tekur er enn mikilvægara að við reynum öll að koma í veg fyrir að skepnur séu þjóðveginum, eitt bílslys eru einu bílslysi of mikið.“
Sveitarstjórn hefur nú látið setja girðinguna aftur upp. Óskað er eftir því að hún fái að standa óáreitt og er höfðað til ábyrgðar þeirra sem eiga hlut að máli.
