Vísindamenn í Kína segjast hafa læknað 59 ára karlmann af sykursýki. Til er tvenns konar sykursýki, sykursýki 1 og 2, og var maðurinn með týpu 2 sem er mun algengari en sú fyrri. Gekkst maðurinn undir stofnfrumumeðferð árið 2021 og hefur hann ekki þurft á lyfjum að halda síðan 2022.

Í umfjöllun Mail Online kemur fram að vísindamenn hafi búið til frumur sem finnast í briskirtlinum og stuðla að myndun insúlíns og halda blóðsykrinum í jafnvægi.

Maðurinn hafði verið með sykursýki í 25 ár og þurft á lyfjum að halda á hverjum degi. Er talið að þetta sé fyrsta tilfellið þar sem einstaklingur læknast af sykursýki.

Vísindamenn segja að þetta dæmi gefi góða von upp á framhaldið.

„Ég held að þessi niðurstaða sýni vel þær framfarir sem hafa orðið í stofnfrumumeðferðum fyrir sykursjúka,“ segir Timothy Kieffer, prófessor við University of British Columbia í Kanada, í samtali við South China Morning Post. Tekið er fram að Timothy hafi ekki verið í hópi þeirra vísindamanna sem tóku þátt í rannsókninni.

Óvíst er þó hvort eða hvenær hægt verður að bjóða upp á meðferðina fyrir þá fjölmörgu sem þjást af sykursýki. Gera þarf rannsóknir á fleiri sjúklingum og ef vel tekst til finna út leið til að hraða ferlinu þar sem stofnfrumumeðferðir eru afar tímafrekar og dýrar.