„Ég er sjálf í þeim hópi, komin á áttræðisaldurinn, orðin 72 ára og lifi góðu lífi á sólarströnd, nánar tiltekið á Tenerife, en nú skal mín hegnt fyrir ódæðið að vilja frekar dvelja á sólarströnd í ellinni en að lifa í eymd og volæði og moka snjó norður undir heimskautsbaug,“ segir Anna í pistli á Facebook-síðu sinni hvar hún heldur úti einskonar dagbók um lífið á Tenerife fyrir vini og fylgjendur sína.
„Ég viðurkenni vissulega að ég hefi það gott á þessari fallegu eyju, en af hverju þarf íslenska ríkið að gera slíka athugasemd við dvöl mína hér að svipta mig persónuafslættinum frá skatti?“
Anna segist elska Ísland en um leið setur hún ákveðinn fyrirvara við hollustu sína við landið.
„Bjarni Ben og ríkisstjórn hans undir forystu Katrínar Jakobsdóttur ákveður að ég sé minna virði en Íslendingar sem dvelja á Íslandi og ákveða því að ég eigi að greiða hærri gjöld til ríkissjóðs en þeir Íslendingar sem búa á Íslandi. Ég næ þessu ekki,“ segir Anna sem spyr hvort hún ætti ekki að greiða lægri gjöld til Íslands vegna dvalar sinnar erlendis og þar af leiðandi sé minni kostnaður vegna hennar.
„Það er vissulega til annar möguleiki sem er sá að greiða skatta til Spánar, en þá tapar íslenska ríkið skatttekjum. Viljum við það frekar?“
Anna er meðlimur í Félagi eldri borgara í Reykjavík og einnig meðlimur í Landssambandi eldri borgara. Kallar hún eftir því að þessi samtök beiti sér í málinu.
„Ég spyr í fúlustu alvöru? Ætla LEB og meðlimafélög þess að láta þetta viðgangast? Ég veit að LEB hefur eytt löngum stundum í að rífast við ríkið um einhverjar krónur við Tryggingastofnun ríkisins, en eru þau tilbúin til að taka slaginn og fá þessum ólögum breytt til hagsbóta fyrir okkur eldri borgarana? Ég hefi engar áhyggjur af Tryggingastofnun ríkisins enda vil ég sem minnst af þeim óskapnaði vita og læt mér nægja þann lífeyri sem ég fæ frá lífeyrissjóðum.“
Kallar hún að lokum eftir svörum frá þessum sömu félögum. „Hvað ætla þau að gera í þessum málum? Ef þau beita sér ekki af hörku gegn þessum nýju ólögum, geta þau lagt sig niður.“
