Mál ljósmyndara RÚV sem virðist reyna að opna mannlaust einbýlishús í Grindavík í gær er komið inn á borð Lögreglunnar á Suðurnesjum. Þetta kemur fram í færslu á Facebook-síðu embættisins.
Óhætt er að fullyrða að myndbandið hafi vakið hörð viðbrögð en eigandi hússins, sem baðst undan því að DV myndi birta það, deildi því á samfélagsmiðla fyrr í dag. Þar sést ljósmyndarinn, íklæddur gulu vesti sem merkt er RÚV, koma upp að húsinu og skyggnast inn í það. Svo virðist sem maðurinn reyni að opna útidyrahurð og þá sést hann róta í blómapottum fyrir utan húsið, mögulega í leit að lyklum.
Eins og áður segir hefur myndbandið vakið hörð viðbrögð, sérstaklega hjá Grindvíkingum, sem eru margir hverjir fokreiðir yfir þeirri staðreynd að verið sé að reyna að komast inn á mannlaus heimili þeirra þegar þeim er meinaður aðgangur að bænum í öryggisskyni.
Heiðar Örn Sigurfinnsson, fréttastjóri RÚV, staðfestir í skriflegu svari til DV að um ljósmyndara fréttastofunnar sé að ræða. „Við hörmum að sjálfsögðu atvikið. Erum búin að ræða við ljósmyndarann og yfirfara okkar vinnuferla,“ segir Heiðar Örn.
Þá tekur hann fram að RÚV hafi einnig sett sig í samband við húseigandann þar sem málið hafi verið útskýrt.
RÚV hefur birt tilkynningu þar sem atvikið er harmað og beðist afsökunar:
„Starfsmaður RÚV sást í dag á öryggismyndavél reyna að komast inn í yfirgefið hús og leita að lyklum að læstum dyrum. Fréttastofa RÚV harmar þetta atvik og biður íbúa hússins og alla Grindvíkinga innilegrar afsökunar á því.
Fréttamenn RÚV hafa kappkostað að fjalla um atburðina í Grindavík af virðingu fyrir íbúum og eigum þeirra, og vinnubrögðin sem sjást á myndskeiðinu eru ekki í anda vinnureglna eða þess anda sem fréttastofan starfar í.
Við höfum rakið atvikið til misskilnings og óðagots á vettvangi, en munum í kjölfarið fara yfir verkferla okkar og vinnureglur og brýna fyrir öllum þeim sem fara á vettvang að virða einkalíf og eigur Grindvíkinga, og valda þeim ekki meiri óþægindum eða sorg en þeir hafa þegar orðið fyrir.“
