Lífeyrisþegi á áttræðisaldri hefur sent Vestmannaeyjabæ kröfubréf þar sem farið er fram á afsökunarbeiðni og greiðslu 3 milljóna króna miskabóta. Krafan er vegna ítekraðrar lítillækkandi og meiðandi framkomu starfsfólks Vestmannaeyjabæjar í garð viðkomandi og mismunun á grundvelli húðlitar og trúarbragða. Verði ekki orðið við kröfunni má bærinn búast við því að höfðað verði mál.
Í bréfinu, sem DV hefur undir höndum, kemur fram að konan sé upprunalega frá Íran og sé múhameðstrúar. Hún er búsettur í Vestmannaeyjum og er með sögu um alvarlegan hjartasjúkdóm.
Í bréfinu eru raktar þrjár ástæður fyrir kröfunni en fram kemur að um sé að ræða ítrekuð og endurtekin atvik sem geti ekki, sé horft á hlutina í samhengi, verið tilviljun eða mistök af hálfu starfsmanna Vestmannaeyjarbæjar.
Í fyrsta lagi hafi verið ítrekað gengið framhjá konunni í úthlutunum leiguíbúða aldraða þrátt fyrir að aldur og sjúkrasaga ætti að hafa nú þegar tryggt slíka íbúð.
Í öðru lagi hafi starfsfólk á vegum Vestmannaeyjarbæjar ítrekað sent henni mat sem inniheldur svínakjöt þrátt fyrir fjölmargar ábendingar þess efnis að viðkomandi borði ekki slíkt vegna trúar sinnar.
Í þriðja lagi hafi starfsfólk sveitarfélagsins í tvígang tekið upp á því að flytja konuna hreppaflutningum til Reykjavíkur án nokkurrar sýnilegrar ástæðu eða lagaheimildar og í því felist ólögmæt meingerð sem sé skaðabótaskyld.
Bréfið er dagsett í gær, mánudaginn 23. október, og er það hæstaréttarlögmaðurinn Vilhjálmur H. Vilhjálmsson, sem er lögmaður lífeyrisþegans. Hefur Vestmannaeyjabær vikufrest til þess að bregðast við kröfunni en verði ekki orðið við henni áskilur Vilhjálmur sér rétt til þess að höfða mál fyrir hönd lífeyrisþegans án frekari viðvörunar.
