Franskir forsetar eru svo sem þekktir fyrir að halda sig ekki bara við eiginkonur sínar. Frægasta dæmið er líklega að nóttina sem Díana prinsessa lést í umferðarslysi í París fannst Jacques Chirac, forseti, ekki lengi vel. Á endanum fannst hann í örmum ítölsku kvikmyndastjörnunnar Claudia Cardinale en ekki örmum eiginkonu sinnar.
Ástæðan fyrir þessum vangaveltum Frakka þessa dagana eru ummæli Donald Trump sem segist liggja á upplýsingum um kynlífshneyksli Macron. Meðal þess sem alríkislögreglan FBI lagði hald á við húsleit heima hjá Trump þann 8. ágúst var skjalamappa merkt „Frakklandsforseti“. Í Frakklandi er hún nefnd „Úllala! – Kynlífsskrá Macron“ að sögn Daily Mail.
Ekki er vitað hvað mappan inniheldur en það hefur ekki stöðvað fólk í að ræða hugsanlegt innihald hennar.
Trump hefur lengi virst áhugasamur um kynlíf Macron og segir Rolling Stone tímaritið að hann hafi stært sig af því í einkasamtölum að búa yfir safaríkum upplýsingum um kynlíf forsetans. Hann er sagður hafa sagt að Macron sé mjög „slæmur“ og það viti ekki margir.
Það sem almennt er vitað um Macron er að hann kynntist eiginkonu sinni Brigitte þegar hann var 15 ára skólapiltur en hún 39 ára kennari. Gift og þriggja barna móðir.
En eitt og annað hefur verið sett fram um einkalíf Macron. Til dæmis neyddist hann til að neyta því í kosningabaráttunni 2017 að hann væri félagi í „lobbíistasamtökum ríkra samkynhneigðra“ og að hann ætti í ástarsambandi við Mathieu Gallet sem var þá forstjóri Radio France. Gallet fer ekki leynt með samkynhneigð sína og var áberandi í frönsku þjóðlífi og hitti Macron margoft við hin ýmsu tækifæri.
Macron neyddist til að neita því að hann ætti í sambandi við Gallet. Hann sagðist vera sá sem hann er og hefði ekkert að fela.
Ári síðar gengu orðrómar í París um að Macron væri að sofa hjá Alexandre Benalla, fyrrum yfirmanni öryggismála hans og síðar varastarfsmannastjóra hans. Var því haldið fram að svona hlyti að vera í pottinn búið fyrst Macron tók vægt á Benalla eftir að myndir náðust af honum lemja almennan borgara þegar hann var við öryggisgæslu vegna mótmæla.
Brigitte hefur heldur ekki sloppið við slúður og orðróma. Blaðamenn, sem teljast til öfgahægrimanna, hafa ítrekað haldið því fram að hún hafi fæðst sem karl og hafi heitið Jean-Michel Trogneux og hafi farið í kynskiptaaðgerð snemma á níunda áratugnum. Hópar tengdir Marine Le Pen og flokki hennar sem og andstæðingar bólusetninga og meðlimir Gulu vestanna hafa dreift þessum staðhæfingum en virtir franskir fjölmiðlar hafa fjallað um þær og sagt þær vera rangar.
