Fréttablaðið greindi frá því í gær að Arnar Grant og Vítalía Lazareva hafi verið kærð til héraðssaksóknara fyrir tilraun til fjárkúgunar. Kærendurnir eru þeir Ari Edwald, Hreggviður Jónsson og Þórður Már Jóhannesson.

Kæran á rætur sínar að rekja til uppákomu í sumarbústaðarferð í Skorradal árið 2020. Þar voru þremenningarnir að skemmta sér ásamt og Þor­steini M. Jónssyni og Arnari. Sá síðastnefndi bauð Vítalíu í heimsókn eftir miðnætti þegar ölvun var orðin talsverð en þá hafði Þorsteinn yfirgefið staðinn.

Ári síðar, 28. október í fyrra, fengu þremenningarnir skilaboð frá Vítalíu þess efnis að hún ætlaði að leita réttar síns vegna meintra brota þremenninganna gegn henni. Daginn eftir birti  hún svo færslu á Instagram þar sem hún sakaði þremenninganna ásamt Arnari um að hafa brotið á sér kynferðislega í pottinum. Sú færsla var síðan tekin niður samdægurs.

Í kærunni sem um ræðir, sem lög­menn Ara, Hregg­viðar og Þórðar af­hentu á skrif­stofu Héraðs­sak­sóknara síðast­liðinn föstu­dag, er byggt á því að þau Víta­lía og Arnar Grant hafi staðið sam­eigin­lega að at­burða­rás sem hófst seinni­partinn í nóvember sama ár.

Þá er fullyrt í frétt Fréttablaðsins frá því í gær að Vítalía hafi sent skilaboð á eiginkonur Þórðar Más og Hreggviðs sem og son eins þremenninganna. Í símtali við Hreggvið hafi hún tjáð honumað rúss­neskir lög­fræðingar væru að vinna að málinu hennar og að þeir væru staddir á heimili hennar í Mos­fells­bæ.

Þá mun hún hafa lagt á­herslu á að Arnar Grant yrði látinn í friði og að komið yrði vel fram við hann og ekki mætti reka hann úr golf­hópnum Stullunum sem þeir áttu aðild að þre­menningarnir, Arnar og fleiri.

„Fráleit tilraun til að afvegaleiða umræðuna“

Arnar Grant hefur nú tjáð sig um kæruna en það gerði hann með yfirlýsingu sem hann sendi á fréttastofu Vísis. Í yfirlýsingunni segir Arnar að kæran sé til þess gerð að afvegaleiða umræðuna og draga úr trúverðugleika sínum.

„Að gefnu tilefni:

Ég vísa á bug aðdróttunum þar sem reynt er að bendla mig við fjárkúgun í tengslum við kynferðisafbrotamál. Þetta er fráleit tilraun til að afvegaleiða umræðuna og draga úr trúverðugleika mínum sem lykilvitni í málinu,“ segir Arnar Grant í yfirlýsingunni