Sverrir Einar Eiríksson, eigandi Nýju Vínbúðarinnar, var á þriðjudag sakfelldur fyrir skattsvik í tengslum við rekstur þriggja einkahlutafélaga. Var hann dæmdur í tíu mánaða skilorðsbundið fangelsi og til greiðslu 64,4 milljóna króna sektar í ríkssjóðs. Þarf hann að greiða sektina innan fjögurra vikna en ella sitja í 360 daga fangelsi.

Í tilefni af dómnum hefur Sverrir sent frá sér fréttatilkynningu um málið þar sem kemur fram að hann hyggist standa skil á sektargreiðslunni. Segir hann að dómurinn sé áfall fyrir sig þar sem hann hafi ekki áður gerst sekur um refsiverða háttsemi. Tilkynningin er eftirfarandi:

„Í fyrradag féll dómur í Héraðsdómi Reykjavíkur í máli héraðssaksóknara á hendur mér fyrir skattalagabrot vegna þriggja félaga, þar sem ég var ábyrgðarmaður. Upphaflega hljóðaði ákæran upp á vanskil skatta og peningaþvætti, en við þingfestingu málsins 16. mars sl. féll ákæruvaldið frá ákæru um peningaþvætti.

Ég hef játað allar sakargiftir í málinu og kem til með að standa skil á sektargreiðslu sem nemur tvöföldum vanskilum skattgreiðslnanna, alls 64,4 milljónum króna. Þá var mér gerð 10 mánaða skilorðsbundin fangelsisrefsing sem fellur niður að tveimur árum liðnum. Mér er þessi dómur nokkuð áfall, enda ekki áður gerst sekur um refsiverðan verknað, líkt og fram kemur í dómnum.

Ég í nærri aldarfjórðung stundað ýmis konar viðskipti, þó mest fasteignaviðskipti hér á landi og í Bretlandi. Þá hef ég komið að kaupum á gulli og demöntum, stundað lánastarfsemi, veitinga- og gistihúsarekstur, rekið starfsmannaleigu og fleira. Flest hefur gengið vel en þó hefur ekki allur rekstur gengið upp. Þau félög sem um ræðir héldu utan um starfsemi á sviði veitingareksturs. Því miður var sá rekstur um margt erfiður. Þrátt fyrir að ég legði mig allan fram varð ég að játa mig sigraðan að lokum og því fór sem fór með þau félög.

Núna einbeiti ég mér að öðrum verkefnum og er létt að bundinn er endi á þessi erfiðu mál.“