Fyrrverandi skrifstofustjóri læknaráðs Landspítalans, Örn Þ. Þorvarðarson, hefur verið ákærður fyrir fjárdrátt. Er hann sakaður um að hafa dregið sér rúmlega 4,1 milljón króna af fjármunum starfs- og gjafasjóðs læknaráðs Landspítalans á árunum 2012 til 2016.

DV hefur ákæru héraðssaksóknara í málinu undir höndum. Eru þar listaðar upp millifærslurnar sem ákært er fyrir og eru þær samtals 34 talsins. Lægsta upphæðin nemur 55 þúsund krónum og sú hæsta tæplega 600 þúsund.

Héraðssaksóknari krefst þess að Örn verði dæmdur til refsingar og greiðslu alls sakarkostnaðar.

Landspítalinn gerir einkaréttarkröfu í málinu og krefst skaðabóta upp á tæplega 2,5 milljónir. „Krafa þessi er gerð fyrir hönd starfsmanna spítalans sem eru eigendur þess fjár sem ákærði er talinn hafa dregið sér með ólögmætum hætti. Aðild Landspítala er því byggð á að ákærði framdi hið meinta brot í starfi sem hann var ráðinn til að sinna sem starfsmaður spítalans,“ segir í ákærunni.

Málið verður þingfest fyrir Héraðsdómi Reykjavíkur þann 20. apríl næstkomandi.