„Mig langar til að koma hrósi til lögreglunnar á framfæri. Ég fékk símtal í gær kl. 14 frá lögreglumanni og þetta er stofnun sem oft er talað illa um en ég er mjög þakklátur lögreglunni núna. Ég veit að lögreglan er undir miklu vinnuálagi og þess vegna er ég mjög þakklátur þeim fyrir það sem þeir gerðu fyrir mig í gær,“ segir Vesturbæingur sem hafði samband við ritstjórn DV í morgun.

Viðkomandi maður, sem ekki vill láta nafn síns getið, á jeppa af gerðinni Ford Explorer. Það snjóaði í eftirmiðdaginn í gær og svo illa vildi til að þessum manni hafði láðst að skrúfa aðra afturrúðuna upp að fullu. Þess vegna snjóaði inn í bílinn. Nágranni gerði lögreglu viðvart sem lagði á sig að grafa upp hver ætti viðkomandi bíl og hringja í hann.

„Ég er líka þakklátur nágranna mínum og vil koma hrósi til hans og lögreglunnar á framfæri,“ segir maðurinn.

„Áttu Ford Explorer?“ spurði lögreglumaðurinn manninn og þegar hann játti því sagði lögreglumaðurinn: „Það er að snjóa inn í bílinn þinn.“

Vestubæingurinn segir að símtalið hafi borist svo snemma að bíllinn hafi ekki orðið fyrir tjóni. „Það var dálítil bleyta, það var allt og sumt.“

„Ég þakkaði lögreglumanninum hjartanlega en hann sagði að ég ætti líka að þakka mínum góða nágranna,“ segir maðurinn sem vill koma þakklæti á framfæri bæði til lögreglunnar og nágranna síns.