„Ég játa að við fyrstu fréttir af viðtali Vitaliu við Eddu Falak í hlaðvarpinu Eigin konur velti ég fyrir mér tilganginum með því að opna sig um svo persónulega reynslu,“ segir Björk Eiðsdóttir, blaðamaður og umsjónarmaður helgarblaðs Fréttablaðsins, í leiðara dagsins. Þar fjallar hún um mál málanna, frásögn Vítalíu Lazareva af samskiptum sínum við fimm þáverandi áhrifamenn í samfélaginu.
Björk segir að eftir því sem hún leiði hugann betur að erfiðri frásögn Vítalíu, því sannfærðari sé hún um mikilvægi hennar.
„Ég, sem er komin yfir fertugt, verð reglulega að horfast í augu við þá staðreynd að þó að ég sé kona, femínisti og harður andstæðingur kúgandi áhrifa feðraveldisins, er ég líka afsprengi kynslóðarinnar sem ól mig upp og mótaði,“ segir Björk. Hún bendir á að hún hafi alist upp við að sumt tali maður ekki um og atburði eins og þá sem Vítalía uppliði sé bæði óþægilegt að tala um og heyra af.
Hún var í sambandi við giftan mann og tók þátt í feluleiknum í kringum samband sitt við hann. Hún var heldur ekki nægilega skýr þegar farið var yfir mörk hennar. Hjónadjöful kalla hana sumir og fleiri benda á að hún hefði mátt vita betur,“ segir Björk.
Hún segir að þeir sem hugsa svona hafi ekki upplifað valdaójafnvægi við það sem henni var boðið uppá. Þarna var hún með manninum sem hún elskaði og körlum á aldri við föður hennar boðin afnot af henni.
„Þeir voru margir og þeir voru ríkir, þekktir, voldugir og einn þeirra taldi hún að væri framtíðarmaður sinn. Þeir misnotuðu aðstöðu sína og yfirburði en Vitalia hefur snúið hlutverkunum við. Hennar er nú valdið og yfirburðirnir og þeirra er skömmin. Viðsnúningurinn skiptir máli fyrir okkur öll, takk fyrir að taka slaginn,“ segir Björk sem er þakklát Vítalíu.
