Valbjörn Steingrímsson, fyrrverandi forstjóri Heilbrigðisstofnunarinnar á Blönduósi, segir það bábilju að alltaf sé betra að veita öldruðu fólki þjónustu á heimilum þess í stað þess að það flytji á öldrunarheimili ef vilji og heilsubrestur kalli á það.

Þetta kemur fram í Morgunblaðinu í dag.

„Þessi kenning er röng og þótt það geti átt við í þeim tilfellum þar sem fólk er tiltölulega hresst hafa ekki verið færðar fyrir því neinar sannanir eða flutt fyrir því rök að það sé ódýrara að geyma fólk heima,“ er haft eftir honum um þá stefnu að aldraðir skuli njóta þjónustu heima til að draga úr þörf fyrir hjúkrunarheimili. Hann sagði það auka fátækt, einsemd og vanlíðan að þvinga fólk til að búa heima og að dýrt sé að reka heimili og lífeyrir standi ekki undir þeim kostnaði.

Ólafur Þór Gunnarsson, þingmaður og öldrunarlæknir, segist ekki hafa trú á að næstu kynslóðir muni sætta sig við að búa á stofnunum. Hann telur að bæta þurfi heimaþjónustu og heimahjúkrun því það sé það fyrirkomulag sem fólk muni kjósa í framtíðinni. Þetta verði bæði hagkvæmara fyrir samfélagið og einnig heppilegra fyrir þá sem nota þjónustuna.

„Eins og kerfið er uppbyggt núna er allt of mikil áhersla lögð á að fólk fari inn á hjúkrunarheimili þegar í mörgum tilvikum er hægt að mæta þörfum þess betur og með minni tilkostnaði með aukinni stuðningsþjónustu heima,“ er haft eftir Svandísi Svavarsdóttur, heilbrigðisráðherra sem sagði jafnframt að unnið sé að fjölgun hjúkrunarrýma.