Lögreglan á höfuðborgarsvæðinu óskar eftir vitnum að umferðaróhappi í Rjúpufelli í Reykjavík laugardagskvöldið 5. október, en tilkynning um málið barst lögreglu klukkan 22.27.
Í tilkynningu frá lögreglu kemur fram að ekið hafi verið á fjórar kyrrstæðar bifreiðar á móts við Rjúpufell 25-27, en tjónvaldurinn ók rakleiðis af vettvangi.
„Ökumaðurinn er hvattur til að gefa sig fram, en geti einhverjir veitt upplýsingar um hann eru hinir sömu vinsamlegast beðnir um að hafa samband við lögreglu í síma 444 1000. Upplýsingum má einnig koma á framfæri með tölvupósti á netfangið sigrun.jonasdottir@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu. Meðfylgjandi er mynd frá vettvanginum í Rjúpufelli,“ segir í skeyti lögreglu.